Blogia
Mimi de Ribono

El pelleyu vinu.

El pelleyu vinu.

Tovía me respingo cuando m'alcuerdo del monstruu. Yo de día nun tenía mieu d'él, pero col atapecer mirábalu escucando detrás de la puerta. Quiciás cuando yo nun taba movíase pel cuartu entafarrándolo too de negro. Abriendo'l gañote cosíu col cordel, nos mios suaños, danzaba como si tuviere vivu. Si, yera un pelleyu de vinu, grandón, tou enllenu llevaría unos ochenta llitros de vinu de Lleon. Tenía cuatro pates y siempre taba arrimáu a la parede, como cansáu.

Mio pa encargaba ca poco un pelleyu a Biru, sí, un muleru que trepaba pel monte pa aportanos carbón y vinu.

Echábamos-y la voz cuando diba pel camín pa encarga-y otru pelleyu. Tardaba poco en subilu, una selmana o asina. Esi día dábamos-y el pelleyu achapláu, ensin gota vinu, y camudábamos-ylu  per otru enllenu tou gordón.

Aquel pelleyu yera como de casa. Toles tardes xugaben los mios tios y mio pa na cocina de casa a les cartes, y tamién bebíen vinu del pelleyu abondo.

La mio hermana y yo yéramos como chigreres y pasábamos la tarde trasegando vinu nun vasu grande, como de mediu llitru, blancu de lloza y con un dibuxín pequeñín d'una florina. Bebíen toos pel mesmu vasu y durába-yos bien poco na mesa. Entós tornábamos a abrir el gargüelu del pelleyu quitándo-y  el cordel amarráu y voltiábamoslu un poquiñín y ¡otra vegada a enllenar el vasu con otra caciplada!.

Asina yeren les tardes nes Cases de La Fonte, cuando yo yera una neñina tovía.

 

 

¿Y esta publicidad? Puedes eliminarla si quieres

2 comentarios

Mimi de Ribono -

Ten en cuenta que nesi llugar nun había chigre, amás pedíase'l pelleyu una vegada al mes y yeren ente cerca la docena persones pa bebelu. Nun tocaben a tanto. Piensa tamién que la medida del tiempu nun tien nada que ver col traxín de güei nes ciudaes. Yera otra sociedá y otres costumbres. Un saludu.
¿Y esta publicidad? Puedes eliminarla si quieres

ayalgueru -

"tou enllenu llevaría unos ochenta llitros de vinu de Lleon. ...
Mio pa encargaba ca poco un pelleyu a Biru, sí"

ca poco ? coime bien poco vos duraben 80 llitros de vino ;-)
¿Y esta publicidad? Puedes eliminarla si quieres