Les mazcaraes de Valdesoto.

Tuvi el vienres, día 12, y tamién el sábadu 13,  nes mazcaraes de Valdesoto. El vienres falaron dellos eruditos qu’investiguen l’orixen y significáu de los ritos de les mazcaraes n’Asturies y na Península Ibérica. Toa una lleición de sabiduría y conocencia.

Na tarde del sábadu fíxose’l desfile (yo amazcaréme tamién). De sópitu alcontréme col pasáu, rituales cuasi escaecíos na nueche los tiempos. Ye un desfile d’ayalgues etnográfiques:

Respiguéme colos Sidros, Os Reises d’Allande (o choqueiro, a basoira, a cardadora...).

Díbamos un bon puñarráu de xente amazcaritao. Pueblu abaxo dende Lliceñes. Pidimos l’aguilandu per chigres y cases. Diéronnos rosquíes, frixuelos, sidra, güisqui, de too.

Rematóse la folixa al llau de la ilesia onde echaron la comedia neños y mayores.

¿Qué voi dicivos?. ¡Puxa Valdesoto!. ¡Puxa les Mazcaraes d’Iviernu!.

5 comentarios

[Mimi de Ribono - 24 de febrero de 2010 - 20:10]

Tolos argumentos favoratibles p'afitar una llingua (nel casu l'asturianu minoritaria nesti momentu históricu), necesiten munchos pegollos pa que nun funda la panera: medios de comunicación, publicaciones, fechos y declaraciones favoratibles d'onde vengan. Na mio opinión esta cadarma necesita no cimero que se fale la llingua, bien, mal, regular, neofalantes, llingua madre o medio pensionistes. Si s'escaez l'asturianu oral y toles sos varientes y llocalismos pierde abondu sentíu la llucha.
Saudos, Pelayu. Tol mundu quier que tornemos a venos y esto faime enfotame en que va haber más xornaes d'alcuentros blogueros.

[Pelayu - 24 de febrero de 2010 - 13:52]

De tolo que falamos quedárenme trés coses pernidies. La primera ye la que tu dices que tenemos tantu enfotu los que defendemos lo nueso que naide va poder con nós. La segunda, que nun tenemos un vierbu que gulismar a otres naciones (nin llingua, nin hestoria, nin paisaxes... y agora mesmo tampoco blogosfera :-) ). Y la cabera de les trés, que quedé con ganes de más, ḥeḥe; súpome a poco colo qu'a min me presta da-y a la tarabica y más si con xente can encantador como vosotros.

Un saludu candial, y a ver si volvemos coincidir o mos xuntamos nós porque queremos ;-)

[Mimi de Ribono - 21 de febrero de 2010 - 17:47]

¡Home, Pelayu!. Ayeri aprovechemos bien el tiempu p'arreglar Asturies del tirón. Ente culín y culín dímos-y a la parpayuela abondo. Quedónos claro los que defendemos lo nueso tenemos tantu enfotu que naida va poder con nosotros.
Un saludín.

[Pelayu - 21 de febrero de 2010 - 13:13]

Toa estra tiba de festexos son, como bien dices, "toa una lleición de sabiduría y conocencia." De sabiduría y conocencia de lo nueso, igual ye por ello que nun lo axixen muncho dende'l gobiernín.

Pese a quién-y pese, los asturianos y lo asturiano siguimos esistiendo, y bien-yos va vagar l'intentar desanicianos.

Un saludu!!

[XANA - 15 de febrero de 2010 - 14:36]

LES MAZCARAES ASTURIANES AUTÉNTIQUES CÉLTIQUES SON EL PRIMERU DE XINERU Y NON NEL CARNAVAL, CARNAVAAAAAL CRISTIANU.